Դեղի օգտագործման հրահանգ

Արտադրող

Янссен Фармацевтика Н.В, Бельгия. 

Դեղաձև

Թաղանթապատ դեղահատեր։

Նկարագրություն

Սպիտակ կամ համարյա սպիտակ, կլոր, երկուռուցիկ թաղանթապատ դեղահատ, որի մի կողմում գրված է «JANSSEN»։

Բաղադրություն

Մոտիլիում դեղի յուրաքանչյուր թաղանթապատ դեղահատը պարունակում է․

Ակտիվ բաղադրատարր. դոմպերիդոն — 10 մգ: 

Օժանդակ նյութեր. լակտոզայի մոնոհիդրատ, եգիպտացորենի օսլա, միկրոբյուրեղային ցելյուլոզա, նախաժելատինացված օսլա, պովիդոն K90, մագնեզիումի ստեարատ, բամբակի սերմերի հիդրոգենիզացված յուղ, նատրիումի լաուրիլսուլֆատ: 

Դեղահատի թաղանթի բաղադրություն. հիպրոմելոզա 2910 5 մՊա*վրկ (mPa*s), նատրիումի լաուրիլսուլֆատ: 

Դեղաբանական ազդեցություն

Մոտիլիում դեղի ակտիվ բաղադրատարրը դոմպերիդոնն է: Այն պատկանում է ստամոքս-աղիքային համակարգի ֆունկցիոնալ խանգարումների բուժման համար նախատեսված «պրոկինետիկներ» կոչվող դեղերի խմբին: 

Դոմպերիդոնը դօպամինի անտագոնիստ է, որն օժտված է հակափսխումային ազդեցությամբ: Դոմպերիդոնը վատ է թափանցում արյուն-ուղեղային պատնեշով: Դոմպերիդոնի կիրառումը՝ հատկապես չափահասների շրջանում, շատ հազվադեպ է ուղեկցվում արտաբրգային կողմնակի ազդեցություններով, սակայն այն խթանում է հիպոֆիզի կողմից պրոլակտինի արտադրությունը: Դեղի հակափսխումային ազդեցությունը հավանաբար պայմանավորված է ծայրամասային (գաստրոկինետիկական) և արյուն-ուղեղային պատնեշից դուրս՝ փսխման կենտրոնի քեմոընկալիչային տրիգեր գոտու դօպամինային ընկալիչների նկատմամբ անտագոնիստական ազդեցությունների համադրությամբ: Կենդանիների վրա իրականացված ուսումնասիրությունների տվյալները, ինչպես նաև դեղի՝ գլխուղեղում հայտնաբերված ցածր կոնցենտրացիաները վկայում են դօպամինային ընկալիչների վրա դոմպերիդոնի առավելապես ծայրամասային ազդեցության մասին: 

Ներքին ընդունման դեպքում դոմպերիդոնը մարդկանց շրջանում բարձրացնում է կերակրափողի ստորին սեղմանի (սֆինկտեր) ճնշումը, բարելավում է անտրոդուդենալ շարժունակությունը և արագացնում է ստամոքսի դատարկումը: Դոմպերիդոնը չի ազդում ստամոքսահյութի արտադրության վրա:

Առողջ կամավորների մասնակցությամբ՝ ICH-14 ուղեցույցի համաձայն, իրականացվել է փորձարկում QT հատվածի մանրամասն ուսումնասիրության նպատակով: Փորձարկման մեջ ընդգրկվել են պլացեբո, ակտիվ դեղի համեմատության և դրական վերահսկման խմբեր: Կիրառվել են թույլատրելի և բուժական դեղաչափերը գերազանցող դեղաչափեր (10 և 20 մգ՝ օրական 4 անգամ): Նշված փորձարկման ընթացքում դոմպերիդոնի թույլատրելի դեղաչափերի կիրառման դեպքում դիտարկված QT հատվածի երկարացումը չի եղել կլինիկորեն նշանակալի: 

Կիրառման ցուցումներ 

• ֆունկցիոնալ, օրգանական, վարակային կամ սննդային ծագմամբ սրտխառնոցի և փսխման ախտանիշների թեթևացման համար, 
• սրտխառնոցի և փսխման այն ախտանիշների թեթևացման համար, որոնք առաջացել են՝  
  • ճառագայթային և դեղային բուժման արդյունքում
  • Պարկինսոնի հիվանդության բուժման նպատակով դօպամինի ագոնիստների (օրինակ՝ լ-դօպա և բրոմոկրիպտին) ընդունման արդյունքում

Եթե Ձեր վիճակը չի բարելավվել կամ վատթարացել է, անհրաժեշտ է դիմել բժշկի:

Հակացուցումներ 

Մի օգտագործեք Մոտիլիում դեղը, եթե՝  

• ունեք գերզգայնություն դոմպերիդոնի կամ օժանդակ նյութերից որևէ մեկի նկատմամբ
• ունեք հիպոֆիզի՝ պրոլակտին արտադրող ուռուցք (պրոլակտինոմա)
• ունեք լյարդի ֆունկցիայի միջին և ծանր աստիճանի խանգարումներ  
• ախտորոշված է սրտի հաղորդականության խանգարում, մասնավորապես՝ QT հատվածի երկարացում, որն ուղեկցվում է էլեկտրոլիտների հավասարակշռության զգալի խանգարումներով կամ սրտի հիվանդություններով, օրինակ՝ սրտի կանգային անբավարարությամբ 

Մի օգտագործեք Մոտիլիում դեղը նաև`  

• երբ ստամոքսի շարժունակության խթանումը կարող է վտանգավոր լինել, օրինակ՝ ստամոքս-աղիքային արյունահոսության, մեխանիկական անանցանելիության կամ թափածակման դեպքում
• QT հատվածի երկարացման ռիսկի հայտնի գործոններով դեղերի հետ միաժամանակ

CYP3A4 ֆերմենտի ուժեղ արգելակիչների հետ միաժամանակ

Դեղն անհրաժեշտ է զգուշությամբ կիրառել՝ 

• երիկամների ֆունկցիայի խանգարման դեպքում
• սրտի ռիթմի և հաղորդականության խանգարումների, այդ թվում՝ QT հատվածի երկարացման, էլեկտրոլիտների հավասարակշռության խանգարման, կանգային սրտային անբավարարության դեպքում

Կիրառման եղանակը և դեղաչափերը

Դեղը միշտ անհրաժեշտ է օգտագործել բուժող բժշկի կամ դեղագետի հրահանգներին խիստ համապատասխան: Եթե համոզված չեք, թե ինչպես պետք է դեղն ընդունել, դիմեք բուժող բժշկին կամ դեղագետին:

Դեղի ընդունումը բաց թողնելու դեպքում հաջորդ դեղահատը պետք է ընդունել հաջորդ ընդունման համար նախատեսված ժամին: 

Չի կարելի ընդունել կրկնակի դեղաչափ՝ բաց թողնվածը լրացնելու նպատակով: 

Դեղի ընդունման տևողությունը չպետք է գերազանցի 1 շաբաթը: Եթե սրտխառնոցն ու փսխումը պահպանվում են մեկ շաբաթից ավելի, խորհրդակցեք բժշկի հետ: 

Սիրտ-անոթային երևույթների զարգացման ռիսկը նվազեցնելու համար դոմպերիդոնը պետք է ընդունել ամենացածր արդյունավետ դեղաչափով և սրտխառնոցն ու փսխումը վերահսկելու համար անհրաժեշտ ամենակարճ տևողությամբ:

Խորհուրդ է տրվում դեղն ընդունել ուտելուց 15-30 րոպե առաջ: Ուտելուց հետո ընդունելու դեպքում դեղի ներծծումը հնարավոր է դանդաղի: 

Դեղն անհրաժեշտ է ընդունել նշանակված ժամին: 

Չափահասներ և երեխաներ (12 տարեկանից բարձր կամ 35 կգ-ից ավելի քաշ ունեցող) 

Թույլատրելի դեղաչափը 10 մգ է, որն ընդունվում է օրական 3 անգամից ոչ ավելի հաճախ:

Առավելագույն օրական դեղաչափը 30 մգ է: 

Մինչև 12 տարեկան երեխաներ, ինչպես նաև 35 կգ-ից պակաս քաշ ունեցող երեխաներ և չափահասներ 

Մոտիլիումի «դեղահատ» դեղաձևը չի կարելի կիրառել 35 կգ-ից պակաս քաշ ունեցող երեխաների շրջանում, քանի որ այդ դեպքում դեղաչափն անհրաժեշտ է վերահաշվարկել:

Գերդեղաչափումը երեխաների շրջանում կարող է առաջացնել նյարդային համակարգի խանգարումներ։

60 տարեկանից բարձր պացիենտներ 

Նախքան Մոտիլիում դեղի կիրառումը՝ խորհրդակցեք բժշկի հետ: 

Լյարդի ֆունկցիայի խանգարում 

Դոմպերիդոնը հակացուցված է լյարդի ֆունկցիայի միջին և ծանր աստիճանի խանգարումներ ունեցող պացիենտներին:

Երիկամների ֆունկցիայի խանգարում 

Հաշվի առնելով, որ երիկամների ֆունկցիայի ծանր աստիճանի խանգարումների դեպքում դոմպերիդոնի կիսատրոհման փուլը երկարում է, կրկնակի կիրառման անհրաժեշտության դեպքում դեղի ընդունման հաճախականությունը՝ կախված խանգարման ծանրության աստիճանից, պետք է նվազեցնել մինչև օրական 1-2 անգամ: Հնարավոր է նաև դեղաչափը նվազեցնելու կարիք լինի: 

Երիկամների ֆունկցիայի ծանր աստիճանի խանգարումներ ունեցող պացիենտները պետք է կանոնավոր հետազոտվեն: 

Երեխաներ և դեռահասներ 

Դոմպերիդոնը չի կարելի կիրառել 12 տարեկանից ցածր երեխաների և դեռահասների շրջանում: 

Հղիություն և կրծքով կերակրում 

Եթե հղի եք կամ կրծքով կերակրում եք կամ ենթադրում եք, որ հղի եք կամ պլանավորում եք հղիություն, ապա Մոտիլիում դեղի ընդունումից առաջ խորհրդակցեք բուժող բժշկի կամ դեղագետի հետ:

Կիրառումը հղիության ընթացքում 

Հղիության ընթացքում դոմպերիդոնի կիրառման վերաբերյալ տվյալներն անբավարար են: Մարդկանց շրջանում դոմպերիդոնի կիրառմամբ պայմանավորված հնարավոր վերարտադրողական թունայնության ռիսկն առայժմ հայտնի չէ: Հետևաբար, հղիության ընթացքում Մոտիլիում դեղը պետք է կիրառել միայն այն դեպքում, երբ դեղի կիրառումն արդարացված է ակնկալվող բուժական օգուտով:

Կրծքով կերակրման շրջան 

Դոմպերիդոնն արտազատվում է կրծքի կաթի միջոցով: Երեխային փոխանցվում է մոր ընդունած դեղաչափի 0,1%-ից պակաս քանակներ: Երբ մայրն ընդունում է դոմպերիդոն, չի կարելի բացառել երեխայի մոտ կողմնակի ազդեցությունների, հատկապես՝ սիրտանոթային խանգարումների, զարգացման ռիսկը: Գնահատելով երեխային կրծքի կաթով կերակրելու առավելությունը և կնոջ համար դոմպերիդոնով բուժման օգուտը՝ պետք է որոշել դադարեցնել կրծքով կերակրելը կամ դադարեցնել/ընդհատել դոմպերիդոնի ընդունումը: 

Անհրաժեշտ է զգուշություն ցուցաբերել կրծքով կերակրվող երեխայի մոտ QT հատվածի երկարացման ռիսկի գործոնների առկայության դեպքում: 

Կողմնակի ազդեցույթուններ 

Կլինիկական փորձարկումների արդյունքում ստացված տվյալներ 

Կողմնակի ազդեցություններ, որոնք դիտարկվել են Մոտիլիում ընդունած պացիենտների ≥ 1 % շրջանում: 

Հոգեկան խանգարումներ. դեպրեսիա, տագնապ, լիբիդոյի նվազում/լիբիդոյի կորուստ: 

Նյարդային համակարգի խանգարումներ. գլխացավ, քնկոտություն, ակատիզիա (անընդհատ շարժվելու ցանկություն): 

Ստամոքս-աղիքային խանգարումներ. փորլուծություն, չորություն բերանի խոռոչում: 

Մաշկի և ենթամաշկային հյուսվածքների խանգարումներ. ցան, քոր:

Սեռական օրգանների և կրծքագեղձի խանգարումներ. կրծքագեղձի մեծացում/ գինեկոմաստիա, ցավոտ կրծքագեղձ, կաթնահոսություն, դաշտանադադար, ցավ կրծքագեղձում, անկանոն դաշտան, կաթնարտադրության խանգարում: 

Ընդհանուր խանգարումներ և փոփոխություններ կիրառման տեղում. ասթենիա:

Կողմնակի ազդեցություններ, որոնք դիտարկվել են Մոտիլիում ընդունած պացիենտների < 1 % շրջանում։

Իմունային համակարգի խանգարումներ. գերզգայնություն: 

Մաշկի և ենթամաշկային հյուսվածքների խանգարումներ. եղնջացան: 

Սեռական օրգանների և կրծքագեղձի խանգարումներ. արտադրություն կրծքագեղձից, կրծքագեղձի այտուց: 

Կողմնակի ազդեցությունների վերաբերյալ սպոնտան հաղորդումների արդյունքում ստացված տվյալներ

Ստորև նշված կողմնակի ազդեցությունները դասակարգված են հետևյալ կերպ. շատ հաճախ (≥ 10 %), հաճախ (≥ 1 %, սակայն < 10 %), ոչ հաճախ (≥ 0,1 %, սակայն < 1 %), հազվադեպ (≥ 0,01 %, սակայն <0,1 %), շատ հազվադեպ (< 0,01 %), հանդիպման հաճախականությունն անհայտ է:

Իմունային համակարգի խանգարումներ. շատ հազվադեպ՝ անաֆիլակտիկ ռեակցիաներ, այդ թվում՝ անաֆիլակտիկ շոկ: 

Հոգեկան խանգարումներ. շատ հազվադեպ՝ գրգռվածություն*, նյարդայնություն: 

Նյարդային համակարգի խանգարումներ. շատ հազվադեպ՝ գլխապտույտ, արտաբրգային խանգարումներ*, ջղակծկումներ*: 

Սիրտ-անոթային համակարգի խանգարումներ. շատ հազվադեպ՝ հանկարծահաս սրտային մահ**, լուրջ փորոքային առիթմիաներ: 

Մաշկի և ենթամաշկային հյուսվածքների խանգարումներ. շատ հազվադեպ՝ անոթանյարդային այտուց, եղնջացան: 

Երիկամների և միզուղիների խանգարումներ. շատ հազվադեպ՝ միզակապություն: 

Լաբորատոր (գործիքային) տվյալներ. շատ հազվադեպ՝ լյարդի լաբորատոր ցուցանիշների շեղում, արյան մեջ պրոլակտինի մակարդակի բարձրացում։

Սեռական օրգանների և կրծքագեղձի խանգարումներ. հազվադեպ՝ գինեկոմաստիա, դաշտանի բացակայություն (ամենորեա): 

*Հետգրանցումային փուլում չափահասների և երեխաների շրջանում դեղի անվտանգության պրոֆիլի տարբերություններ չեն բացահայտվել: Բացառություն են կազմել գլխավորապես նորածինների և վաղ հասակի (մինչև 1 տարեկան) երեխաների շրջանում դիտարկված արտաբրգային երևույթները և հիմնականում մինչև 1 տարեկան և բարձր տարիքի երեխաների շրջանում դիտարկված կենտրոնական նյարդային համակարգի այլ խանգարումները՝ ջղակծկումները և գրգռվածությունը: 

** Հիմնված են համաճարակաբանական տվյալների վրա: 

Գերդեղաչափում 

Գերդեղաչափումը հիմնականում հանդիպում է մինչև 1 տարեկան և ավելի բարձր տարիքի երեխաների շրջանում: Գերդեղաչափման ախտանիշները կարող են ներառել գրգռվածություն, փոփոխված գիտակցություն, ջղակծկումներ, ապակողմնորոշում, քնկոտություն և արտաբրգային ռեակցիաներ:

Դոմպերիդոնի հատուկ հակաթույն գոյություն չունի, սակայն արտահայտված գերդեղաչափման դեպքում դեղի ընդունումից հետո՝ 1 ժամվա ընթացքում կարող է օգնել ստամոքսի լվացումը, ինչպես նաև՝ ակտիվացրած ածուխի ընդունումը: Խորհուրդ է տրվում իրականացնել մանրակրկիտ բժշկական հսկողություն, էլեկտրասրտագրի մշտադիտարկում՝ QT հատվածի հնարավոր երկարացումը հայտնաբերելու նպատակով, և ախտանիշային բուժում: Արտաբրգային ռեակցիաները վերահսկելու նպատակով կարող է արդյունավետ լինել հակախոլիներգիկ և հակապարկինսոնային դեղերի կիրառումը:

Եթե դուք մոռացել եք ընդունել Մոտիլիում դեղը 

Մի ընդունեք կրկնակի դեղաչափ՝ բաց թողնվածը լրացնելու նպատակով: Պարզապես հաջորդ դեղաչափն ընդունեք նախատեսված ժամին:

Դեղային փոխազդեցություն 

Դոմպերիդոնի մետաբոլիզմում գլխավոր դերը կատարում է CYP3A4 իզոֆերմենտը: In vitro հետազոտությունների արդյունքները և կլինիկական փորձը ցույց են տալիս, որ նշված իզոֆերմենտը զգալիորեն արգելակող դեղերի միաժամանակյա կիրառումը կարող է առաջացնել պլազմայում դոմպերիդոնի կոնցենտրացիաների բարձրացում:

Անհրաժեշտ է զգուշություն ցուցաբերել դոմպերիդոնի և ստորև նշված դեղերի միաժամանակյա կիրառման դեպքում, ինչպես նաև պացիենտների նկատմամբ իրականացնել մանրակրկիտ հսկողություն կողմնակի ազդեցությունների նախանշանները և ախտանիշները բացահայտելու նպատակով։

QT հատվածի երկարացում առաջացնող դեղեր 

• IA դասի հակաառիթմիկ դեղեր (դիզոպիրամիդ, հիդրոքվինիդին, քվինիդին)
• III դասի հակաառիթմիկ դեղեր (օրինակ՝ ամիոդարոն, դոֆետիլիդ, դրոնեդարոն, իբուտիլիդ, սոտալոլ) 
• որոշ նեյրոլեպտիկներ (օրինակ՝ հալոպերիդոլ, պիմոզիդ, սերտինդոլ)
• որոշ հակադեպրեսանտներ (օրինակ՝ ցիտալոպրամ, էսցիտալոպրամ)
• որոշ հակաբիոտիկներ (օրինակ՝ էրիթրոմիցին, լեվոֆլօքսացին, մոքսիֆլօքսացին, սպիրամիցին)
• որոշ հակասնկային դեղեր (օրինակ՝ պենտամիդին)
• որոշ հակամալարիային դեղեր (մասնավորապես՝ հալոֆանտրին, լյումեֆանտրին)
• որոշ ստամոքս-աղիքային դեղեր (օրինակ՝ ցիզապրիդ, դոլասետրոն, պրուկալոպրիդ)
• քաղցկեղի բուժման համար կիրառվող որոշ դեղեր (օրինակ՝ տորեմիֆեն, վանդետանիբ, վինկամին)
• որոշ այլ դեղեր (օրինակ՝ բեպրիդիլ, դիֆեմանիլ, մետադոն)

CYP3A4 ֆերմենտի ուժեղ արգելակիչներ (անկախ դրանց՝ QT հատվածը երկարացնելու հատկությունից)  

• պրոտեազա ֆերմենտի արգելակիչներ
• համակարգային ազդեցությամբ ազոլային հակասնկային դեղեր
• որոշ մակրոլիդներ (օրինակ՝ էրիթրոմիցին, կլարիթրոմիցին, տելիթրոմիցին)

Վերոնշյալ ցանկը ներկայացուցչական է, սակայն՝ ոչ սպառիչ:

Հակախոլիներգիկ դեղերի հետ միաժամանակյա կիրառումը կարող է խոչընդոտել դոմպերիդոնի հակադիսպեպտիկ ազդեցությունների զարգացումը: 

Մոտիլիումն օժտված է գաստրոկինետիկական ազդեցությամբ, և տեսականորեն այն կարող է ազդել միաժամանակ ներքին ընդունված, մասնավորապես ակտիվ բաղադրատարրի երկարաձգված ձերբազատմամբ կամ աղելույծ թաղանթապատ դեղահատերի ներծծման վրա: Սակայն պարացետամոլ կամ դիգօքսին ընդունող պացիենտների շրջանում դոմպերիդոնի միաժամանակյա կիրառումը չի ազդել արյան մեջ նշված դեղերի կոնցենտրացիաների մակարդակի վրա: 

Մոտիլիում դեղը կարելի է միաժամանակ կիրառել՝

• այն նեյրոլեպտիկների հետ, որոնց ազդեցությունը դոմպերիդոնը չի ուժեղացնում
• դօպամիներգիկ ընկալիչների ագոնիստների հետ (բրոմոկրիպտին, լեվոդօպա), որոնց անցանկալի ծայրամասային ազդեցությունները (օրինակ՝ մարսողության խանգարումներ, սրտխառնոց և փսխում) դոմպերիդոնն ընկճում է, ընդ որում՝ չազդելով դրանց հիմնական հատկությունների վրա: 

Հատուկ հրահանգներ

Նախքան Մոտիլիում դեղի կիրառումը՝ խորհրդակցեք բուժող բժշկի կամ դեղագետի հետ: 

Երբ Մոտիլիումը զուգակցվում է թթվամարիչների կամ ստամոքսահյութի արտադրությունն ընկճող դեղերի հետ, վերջիններս պետք է ընդունել ոչ թե ուտելուց առաջ, այլ՝ հետո, այսինքն, դրանք չի կարելի ընդունել Մոտիլիումի հետ միաժամանակ, քանի որ այդ դեպքում ներքին ընդունման դոմպերիդոնի կենսամատչելիությունը նվազում է:

Մոտիլիումի թաղանթապատ դեղահատերը պարունակում են լակտոզա, հետևաբար դեղը խորհուրդ չի տրվում կիրառել լակտոզայի անտանելիություն, գալակտոզեմիա կամ գլյուկոզա-գալակտոզայի մալաբսորբցիայի համախտանիշ ունեցող պացիենտների շրջանում: 

Երիկամների ֆունկցիայի խանգարումներ

Երիկամների ֆունկցիայի ծանր խանգարումների դեպքում դոմպերիդոնի կիսատրոհման փուլը երկարում է: Դեղի կրկնակի կիրառման դեպքում անհրաժեշտ է ընդունման հաճախականությունը նվազեցնել մինչև օրական 1-2 անգամ՝ կախված խանգարման ծանրության աստիճանից: Հնարավոր է պահանջվի դեղաչափի նվազեցում։

Ազդեցություն սիրտ-անոթային համակարգի վրա 

Դոմպերիդոնի կիրառումը կարող է առաջացնել էլեկտրասրտագրի QT հատվածի երկարում: Հետգրանցումային դիտարկումների ընթացքում շատ հազվադեպ ստացվել են հաղորդումներ դոմպերիդոն ընդունող պացիենտների շրջանում QT հատվածի երկարացման և «պիրուետ» տիպի առիթմիայի զարգացման (Torsades de pointes) վերաբերյալ: Նշված դեպքերը ներառել են այն պացիենտներին, որոնց մոտ առկա են եղել ռիսկի խառը գործոններ, էլեկտրոլիտների հավասարակշռության խանգարումներ և ուղեկցող բուժում, որոնք հավանաբար եղել են նպաստող գործոններ: 

Համաճարակաբանական հետազոտությունները ցույց են տվել, որ դոմպերիդոնի կիրառումը կապակցված է փորոքային առիթմիաների զարգացման և հանկարծահաս սրտային մահվան բարձր ռիսկի հետ: Առավել բարձր ռիսկ դիտարկվել է 60 տարեկանից բարձր կամ այն պացիենտների շրջանում, որոնք ընդունել են դեղի՝ օրական 30 մգ-ը գերազանցող դեղաչափեր, միաժամանակ ընդունել են QT հատվածի երկարացման հայտնի ռիսկի գործոններով դեղեր կամ CYP3A4 իզոֆերմենտի ուժեղ արգելակիչներ: Այդ պատճառով, տարեցները Մոտիլիում դեղը պետք է կիրառեն զգուշությամբ: 

Չափահասների և երեխաների շրջանում դոմպերիդոնը պետք է կիրառել ամենացածր արդյունավետ դեղաչափով: 

Փորոքային առիթմիաների զարգացման բարձր ռիսկի պատճառով դոմպերիդոնը հակացուցված է սրտի հաղորդականության ախտորոշված խանգարումներով, մասնավորապես QT հատվածի երկարացմամբ, էլեկտրոլիտների հավասարակշռության զգալի խանգարումներով (հիպոկալիեմիա, հիպերկալիեմիա, հիպոմագնեմիա), դանդաղասրտությամբ, ինչպես նաև սրտային հիվանդություններով (օրինակ՝ սրտի կանգային անբավարարություն) պացիենտներին: Էլեկտրոլիտների հավասարակշռության խանգարումները (հիպոկալիեմիա, հիպերկալիեմիա, հիպոմագնեմիա) և դանդաղասրտությունը բարձրացնում են առիթմիաների զարգացման ռիսկը: Դոմպերիդոնով բուժումն անհրաժեշտ է ընդհատել, եթե ի հայտ են գալիս սրտի ռիթմի խանգարումների հետ հնարավոր կապ ունեցող նշաններ և ախտանիշներ: Նման դեպքերում անհրաժեշտ է խորհրդակցել բժշկի հետ: 

Ցանկացած սրտային ախտանիշի զարգացման մասին անհրաժեշտ է անհապաղ տեղեկացրնել բժշկին: 

Երեխաներ և դեռահասներ 

Խորհուրդ չի տրվում Մոտիլիում դեղը կիրառել մինչև 12 տարեկան երեխաների և դեռահասների շրջանում: 

Ազդեցությունը ուշադրություն պահանջող գործողությունների վրա (փոխադրամիջոցների վարում, սարքավորումների հետ աշխատանք)

Խորհուրդ է տրվում խուսափել փոխադրամիջոցներ վարելուց, բարդ մեխանիզմների հետ աշխատելուց և ուշադրություն ու կոորդինացիա պահանջող գործունեությունից, քանի դեռ չեք որոշել, թե դեղն ինչպես է ազդում Ձեր օրգանիզմի վրա:

Թողարկման ձև

Թաղանթապատ դեղահատեր 10 մգ: 

Պոլիվինիլքլորիդից և ալյումինից պատրաստված բլիստերը պարունակում է 10 կամ 30 դեղահատ: Մեկ բլիստերը տեղադրված է ստվարաթղթե տուփի մեջ՝ ներդիր-թերթիկի հետ միասին:

Պահման պայմաններ

Դեղը պահել 15-30°C ջերմաստիճանի պայմաններում։ Պահել երեխաների համար անհասանելի տեղում։ 

Պիտանիության ժամկետ

3 տարի։ Մի օգտագործեք դեղը տուփի վրա նշված պիտանիության ժամկետի ավարտից հետո:

Դեղատնից բացթողման կարգ 

Դեղատոմսով։