Օգտագործման հրահանգ

Արտադրող

«Գերոֆարմ» ՍՊԸ, Ռուսաստան:

Դեղաձև

Լիոֆիլացված դեղափոշի միջմկանային ներարկման լուծույթի պատրաստման համար։

Նկարագրություն

Սպիտակ կամ դեղնավուն երանգով սպիտակ լիոֆիլացված դեղափոշի կամ ծակոտկեն զանգված։

Բաղադրություն

Կորտեքսինի մեկ սրվակը պարունակում է.

Ակտիվ նյութեր՝ կորտեքսին (ջրալույծ պոլիպեպտիդային ֆրակցիաների համալիր) — 10 մգ:

Օժանդակ նյութեր՝ գլիցին (կայունացուցիչ) — 12 մգ։

Դեղաբանական ազդեցությունը

Դեղաբանական խումբ․ Նոոտրոպ դեղեր։

Դեղադինամիկա

Կորտեքսինը ցածր մոլեկուլյար ջրալույծ պոլիպեպտիդային ֆրակցիաների համալիր է, որն անցնելով ուղեղ-արյունային պատնեշով, ուղղակիորեն ներթափանցում է նյարդային բջիջներ։ Դեղը ցուցաբերում է նոոտրոպ, նյարդապաշտպանիչ, հակաօքսիդանտային և հյուսվածքային ազդեցություն։

Նոոտրոպ ազդեցություն։ Կորտեքսինը բարելավում է գլխուղեղի բարձրագույն ֆունկցիաները, ուսանելու և հիշողության հետ կապված պրոցեսները, ուշադրության կենտրոնացումը, տարբեր սթրեսային ազդակների նկատմամբ դիմակայունությունը։

Նյարդապաշտպանիչ ազդեցություն։ Կորտեքսինը պաշտպանում է նյարդաբջիջները ընդերածին տարբեր նյարդաթունային գործոնների (գլուտամատ, կալցիումի իոններ, ազատ ռադիկալներ) ազդեցությունից և նվազեցնում է հոգեմետ նյութերի թունայնությունը։

Հակաօքսիդանտային ազդեցություն։ Կորտեքսինը պաշարում է ճարպերի պերօքսիդային օքսիդացումը նյարդաբջիջներում, բարձրացնում է դրանց կենսունակությունը օքսիդատիվ սթրեսի և թթվածնային քաղցի պայմաններում։ 

Հյուսվածքային ազդեցություն։ Կորտեքսինը ակտիվացնում է կենտրոնական և ծայրամասային նյարդային համակարգերի նյարդաբջիջների մետաբոլիզմը և վերականգնողական գործընթացները, ինչպես նաև բարելավում է գլխուղեղի կեղևի ֆունկցիաները և նյարդային համակարգի ընդհանուր տոնուսը:

Կորտեքսինի ազդեցությունը պայմանավորված է՝  

• նյարդաբջիջների պեպտիդների և ուղեղի նյարդասնուցող գործոնների ակտիվացմամբ
• դրդող և արգելակող ամինաթթուների, դoֆամինի և սերոտոնինի մետաբոլիզմի հավասարակշռության օպտիմալացմամբ 
• գամմա-ամինոկարագաթթվին բնորոշ ազդեցությամբ
• ուղեղի պարոքսիզմալ ջղաձգային ակտիվության նվազեցմամբ և ուղեղի կենսաէլեկտրական ակտիվությունը բարելավելու հատկությամբ
• ազատ ռադիկալների (ճարպերի պերօքսիդային օքսիդացման արգասիքների) գոյացման կանխմամբ

Դեղակինետիկա

Կորտեքսինի բաղադրության մեջ ակտիվ բաղադրատարրի՝ ջրալույծ պոլիպեպտիդային ֆրակցիաների համալիրի առկայությամբ պայմանավորված՝ հնարավոր չէ իրականացնել առանձին բաղադրիչների սովորական դեղակինետիկական վերլուծություն։

Կիրառման ցուցումներ 

Կորտեքսինը, որպես համալիր բուժման բաղադրիչ, ցուցված է՝ 

• գլխուղեղի արյան շրջանառության խանգարումների
• գանգուղեղային վնասվածքների և դրանց հետևանքների
• տարատեսակ ծագմամբ էնցեֆալոպաթիաների
• կոգնիտիվ (հիշողության և մտածողության) խանգարումների
• սուր և քրոնիկ էնցեֆալիտների ու էնցեֆալոմիելիտների
• էպիլեպսիայի
• ասթենիկ վիճակների (վերսեգմենտային վեգետատիվ խանգարումների)
• ուսանելու ունակության նվազեցման
• երեխաների խոսքի և փսիխոմոտոր զարգացման ուշացման
• մանկական ուղեղային կաթվածի տարբեր տեսակների բուժման համար

Հակացուցումներ 

Կորտեքսինը հակացուցված է դեղի նկատմամբ անհատական անտանելիություն ունեցող պացիենտներին: 

Հղիություն և կրծքով կերակրում 

Քանի որ հղիության և կրծքով կերակրման շրջանում կլինիկական փորձարկումների տվյալները բացակայում են, Կորտեքսինը հակացուցված է հղիության շրջանում, իսկ կրծքով կերակրման շրջանում դեղի կիրառման անհրաժեշտության դեպքում հարկավոր է դադարեցնել կրծքով կերակրելը: 

Կիրառման եղանակը և դեղաչափերը

Դեղը նախատեսված է միջմկանային ներարկման համար։ 

Ներարկումից անմիջապես առաջ սրվակի պարունակությունը անհրաժեշտ է լուծել 1-2 մլ ներարկման ջրում կամ պրոկայինի (նովոկայինի) 0,5% կամ նատրիումի քլորիդի 0,9% լուծույթում: Փրփրագոյացումից խուսափելու համար ներարկիչի ասեղն անհրաժեշտ է ուղղել դեպի սրվակի պատը: 

Չափահասներ. 10 մգ դեղաչափով օրական մեկ անգամ: 

Երեխաներ. 

• մինչև 20 կգ մարմնի քաշի դեպքում — 0,5 մգ/կգ դեղաչափով օրական մեկ անգամ
• 20 կգ և ավելի մարմնի քաշի դեպքում — 10 մգ դեղաչափով օրական մեկ անգամ

Բուժման տևողությունը 10 օր է։ 

Անհրաժեշտության դեպքում բուժումը կարելի է կրկնել 3-6 ամիս անց։ 

Կողմնակի ազդեցույթուններ 

Ստորև թվարկված են կլինիկական կիրառման ընթացքում դիտարկված հետևյալ կողմնակի ազդեցությունները՝ ըստ օրգան համակարգերի դասակարգման և հանդիպման հաճախականության նվազման կարգի. շատ հաճախ (≥1/10), հաճախ (≥1/100, <1/10), ոչ հաճախ (≥1/1000, <1/100), հազվադեպ (≥1/10000, <1/1000), շատ հազվադեպ (<1/10000). 

Իմունային համակարգի խանգարումներ

• շատ հազվադեպ․ անաֆիլակտիկ շոկ, ըմպանի անոթանյարդային այտուց, մաշկի ցան, մաշկի քոր, մաշկի հիպերեմիա 

Խանգարումներ՝ ընդհանուր և ներարկման տեղում

• շատ հազվադեպ․ հիպերեմիա ներարկման տեղում

Նյարդային համակարգի խանգարումներ

• շատ հազվադեպ․ փսիխոմոտոր դրդվածություն, շարժումների համակարգման խանգարում, անքնություն 

Սրտի աշխատանքի խանգարումներ

• շատ հազվադեպ․ տախիկարդիա (սրտամկանի կծկման հաճախականության մեծացում) 

Հոգեկան խանգարումներ

• շատ հազվադեպ․ տագնապի զգացողություն

Գերդեղաչափում 

Գերդեղաչափման դեպքեր մինչև այժմ չեն գրանցվել։

Փոխազդեցություններ այլ դեղերի հետ 

Լուծույթ պատրաստելու համար որպես լուծիչ տեղային անզգայացնող լիդոկայինի օգտագործումը փոխկապակցվում է երեխաների շրջանում կողմնակի ազդեցությունների դրսևորումների ծանրության բարձրացման հետ, հետևաբար խորհուրդ չի տրվում դրա կիրառումը։

Կիրառման հատուկ հրահանգներ և նախազգուշացումներ

Կորտեքսին դեղը պետք է օգտագործել միայն բժշկի նշանակմամբ:

Պրոկայինի (նովոկայինի) 0,5% լուծույթը որպես լուծիչ օգտագործելու դեպքում անհրաժեշտ է հետևել պրոկայինի (նովոկայինի) օգտագործման հրահանգում նշված հակացուցումների, նախազգուշական միջոցառումների և տարիքային սահմանափակումների վերաբերյալ տեղեկատվությանը: 

Խորհուրդ չի տրվում տեղային անզգայացնող լիդոկայինի լուծույթը օգտագործել որպես լուծիչ Կորտեքսին դեղի լուծույթ պատրաստելու համար: 

Լուծված դեղով սրվակը չի կարելի պահել այն հետագայում օգտագործելու նպատակով։

Խորհուրդ չի տրվում Կորտեքսինի լուծույթը խառնել այլ լուծույթների հետ։

Կորտեքսինի առաջին ընդունման կամ դրա օգտագործումը դադարեցնելու դեպքում դեղի ազդեցության առանձնահատկություններ չեն արձանագրվել։

Դեղի ընդունումը բաց թողնելու դեպքում խորհուրդ չի տրվում ներարկել կրկնակի դեղաչափ, այլ անհրաժեշտ է հաջորդ ներարկումը կատարել նախատեսված օրը։ 

Չօգտագործված դեղերի ոչնչացման համար հատուկ նախազգուշական միջոցառումներ չի պահանջվում: 

Չօգտագործված դեղերը և թափոնները ոչնչացվում են ՀՀ օրենսդրության համաձայն: 

Ազդեցությունը փոխադրամիջոցներ վարելու և սարքավորումների հետ աշխատելու կարողությունների վրա 

Կորտեքսինի կիրառմամբ պայմանավորված դրդման ախտանիշների ի հայտ գալու դեպքում  այն կարող է ազդել պոտենցիալ վտանգավոր և հատուկ ուշադրություն ու արագ ռեակցիա (փոխադրամիջոցների վարում, աշխատանք շարժվող մեխանիզմների հետ) պահանջող աշխատանքների կատարման վրա:

Թողարկման ձև

10 մգ լիոֆիլացված դեղափոշի՝ միջմկանային ներարկման լուծույթ պատրաստելու համար։ Պոլիվինիլքլորիդային կամ պոլիէթիլենտերեֆտալատի թաղանթից և ալյումինե նրբաթիթեղից պատրաստված շրջագծված բնիկավոր փաթեթը պարունակում է 22 մգ լիոֆիլացված դեղափոշիով լցված 5 մլ ծավալով 5 սրվակ: Ստվարաթղթե տուփի մեջ տեղադրված է 2 շրջագծված բնիկավոր փաթեթ՝ դեղի օգտագործման հրահանգի (ներդիր- թերթիկի) հետ միասին:

Պահման պայմաններ

Պահել 25°C-ից ոչ բարձր ջերմաստիճանի պայմաններում և լույսից պաշտպանված տեղում: 

Պահել երեխաների համար անտեսանելի և անհասանելի տեղում։ 

Պիտանիության ժամկետ

3 տարի։ 

Դեղը չի կարելի կիրառել տուփի վրա նշված պիտանիության ժամկետը լրանալուց հետո:

Դեղատնից բացթողման կարգ 

Բաց է թողնվում դեղատոմսով։