Դեղի օգտագործման հրահանգ 

Արտադրող

«ՆՊՖ Մատերիա Մեդիկա Հոլդինգ» ՍՊԸ, Ռուսաստան:

Դեղաձև 

Բերանի խոռոչից ներծծվող դեղահատեր:

Նկարագրություն  

Սպիտակ կամ գրեթե սպիտակ, ամբողջական եզրերով, տափակ գլանաձև դեղահատ, որի երիզով կողմի վրա դրոշմված է RENGALIN, իսկ մյուս ակոսիկով կողմի վրա՝ MATERIA MEDICA:

Բաղադրություն 

Ռենգալինի յուրաքանչյուր դեղահատ պարունակում է.

Ակտիվ բաղադրատարրեր․

• բրադիկինինի նկատմամբ աֆինային եղանակով մաքրված հակամարմիններ — 0,006 գ*
• հիստամինի նկատմամբ աֆինային եղանակով մաքրված հակամարմիններ — 0,006 գ*
• մորֆինի նկատմամբ աֆինային եղանակով մաքրված հակամարմիններ — 0,006 գ*

Օժանդակ նյութեր․

• իզոմալտոզ – 0,506 գ
• միկրոբյուրեղային ցելյուլոզ — 0,0275գ
• մագնեզիումի ստեարատ — 0,0055 գ
• անջուր լիմոնաթթու – 0.005225 գ
• կոլոիդային սիլիցիումի երկօքսիդ – 0.00275 գ
• նատրիումի ցիկլամատ – 0.00275 գ
• նատրիումի սախարին – 0.000275 գ

*Երեք ակտիվ բաղադրատարրերի համապատասխանաբար 100¹², 100³⁰, 100⁵⁰ աստիճանի ջրասպիրտային նոսրացումների խառնուրդը շերտապատված է իզոմալտոզի վրա:

Դեղաբուժական խումբ 

Այլ հակահազային դեղեր։

Դեղաբանական ազդեցություն  

Դեղադինամիկա  

Նախակլինիկական փորձարկումները ցույց են տվել, որ դեղի ակտիվ բաղադրատարրերը փոխակերպում են ընդերածին կարգավորիչների լիգանդընկալիչային փոխազդեցությունը համապատասխան ընկալիչների հետ. մորֆինի նկատմամբ հակամարմինները՝ օպիատային ընկալիչների, հիստամիի նկատմամբ հակամարմինները՝ H1 հիստամինային ընկալիչների և բրադիկինինի նկատմամբ հակամարմինները՝ B1 բրադիկինինային ընկալիչների հետ, ընդ որում՝ բաղադրատարրերի զուգակցված կիրառումը ուժեղացնում է դեղի հակահազային ազդեցությունը:  

Բացի հակահազային ազդեցությունից, Ռենգալինը՝ բաղադրության մեջ մտնող բաղադրատարրերի շնորհիվ, ցուցաբերում է հակաբորբոքային, հակաայտուցային, հակաալերգիկ, սպազմոլիտիկ (հիստամինի և բրադիկինինի նկատմամբ հակամարմիններ) և ցավազրկող ազդեցություն (մորֆինի նկատմամբ հակամարմիններ): Ռենգալինը H1 ընկալիչների հիստամինակախյալ ակտիվացման և B2 ընկալիչների բրադիկինինակախյալ ակտիվացման փոխակերպման շնորհիվ, ընտրողաբար նվազեցնում է երկարավուն ուղեղի հազի կենտրոնի դրդունակությունը և արգելակում է հազային ռեֆլեքսի կենտրոնական օղակները: Ընկճելով թալամուսի ցավային զգայունության կենտրոնները՝ Ռենգալինը արգելակում է ցավային ազդակների փոխանցումը դեպի գլխուղեղի կեղև: Հյուսվածքային և պլազմային ալկոգենների (հիստամին, բրադիկինին, պրոստագլանդին և այլն) արտազատման նվազեցման արդյունքում Ռենգալինը ընկճում է ծայրամասերից եկող ցավային ազդակների հոսքը: Ի տարբերություն ափիոնային ցավազրկողների՝ դեղը չի առաջացնում շնչառության ընկճում, դեղային կախյալություն, չունի թմրաբեր և քնաբեր ազդեցություն: 

Ռենգալինը, նվազեցնելով բրոնխոսպազմը, թեթևացնում է սուր ֆարինգիտի, լարինգիտի և բրոնխիտի դրսևորումները: Ազդելով հիստամինի և բրադիկինինի սինթեզի և պարարտ բջիջներից դրանց արտազատման վրա՝ դեղը թեթևացնում է ալերգիկ ռեակցիաներից առաջացած համակարգային և տեղային ախտանիշները: 

Դեղակինետիկա  

Ֆիզիկա-քիմիական անալիզի ժամանակակից մեթոդների (գազահեղուկային քրոմատոգրաֆիա, բարձրարդյունավետ հեղուկային քրոմատոգրաֆիա, քրոմատոմասսպեկտոմետրիա) զգայունությունը հնարավորություն չի տալիս որոշել դեղի ակտիվ բաղադրատարրերի պարունակությունը կենսաբանական հեղուկներում, օրգաններում և հյուսվածքներում: Այդ պատճառով Ռենգալինի դեղակինետիկան տեխնիկապես անհնար է ուսումնասիրել:  

Ցուցումներ  

Ռենգալին դեղը ցուցված է․

• շնչուղիների՝ հազով և բրոնխոսպազմով ուղեկցվող սուր և քրոնիկական հիվանդությունների
• գրիպի և սուր շնչառական հիվանդությունների ժամանակ խորխով (թաց) և առանց խորխի (չոր) հազի
• սուր ֆարինգիտի
• լարինգոտրախեիտի
• սուր օբստրուկտիվ լարինգիտի
• քրոնիկական բրոնխիտի
• վերին և ստորին շնչուղիների այլ վարակաբորբոքային և ալերգիկ հիվանդությունների դեպքում

Հակացուցումներ 

Ռենգալինը հակացուցված է դեղի բաղադրատարրերից որևէ մեկի նկատմամբ անհատական գերզգայնության դեպքում: Դեղի արդյունավետության և անվտանգության վերաբերյալ տվյալների անբավարարությամբ պայմանավորված՝ այն խորհուրդ չի տրվում կիրառել մինչև 6 տարեկան երեխաների շրջանում: 

Կիրառումը հղիության և կրծքով կերակրման շրջանում  

Հղիության և կրծքով կերակրման շրջանում Ռենգալինի կիրառման անվտանգությունը ուսումնասիրված չէ: Կիրառման անհրաժեշտության դեպքում անհրաժեշտ է հաշվի առնել օգուտ/վտանգ հարաբերակցությունը: 

Կիրառման ձևեր և դեղաչափեր 

Անհրաժեշտ է ընդունել 1-2 դեղահատ օրական 3 անգամ: Դեղահատն անհրաժեշտ է պահել բերանում մինչև դրա ամբողջական լուծվելը: Դեղը չի կարելի օգտագործել սննդի ընդունման ընթացքում: Հիվանդության ընթացքից կախված՝ դեղի ընդունման հաճախականությունը առաջին երեք օրվա ընթացքում կարող է լինել օրական 4-6 անգամ:

Կողմնակի ազդեցություններ 

Հնարավոր են դեղի բաղադրատարրերի նկատմամբ անհատական գերզգայնության ռեակցիաներ:  

Գերդեղաչափում 

Պատահական գերդեղաչափման դեպքում հնարավոր է մարսողության խանգարում՝ դեղի բաղադրության մեջ առկա օժանդակ նյութերով պայմանավորված:  

Փոխազդեցություններ   

Այլ դեղերի հետ անհամատեղելիության դեպքեր մինչև այժմ չեն գրանցվել:

Ազդեցությունը ուշադրություն պահանջող գործունեության վրա  

Ռենգալինը չի ազդում ուշադրություն պահանջող գործունեություն իրականացնելու և տրանսպորտային միջոցներ վարելու ունակության վրա: 

Թողարկման ձև

Բերանի խոռոչում տարալուծվող դեղահատեր: Պոլիվինիլքլորիդային թաղանթից և ալյումինե նրբաթիթեղից պատրաստված եզրագծված բնիկավոր բլիստերը պարունակում է 10 դեղահատ: Ստվարաթղթե տուփի մեջ տեղադրված է մեկ, երկու կամ հինգ բլիստեր՝ դեղի օգտագործման հրահանգի (ներդիր-թերթիկի) հետ միասին:

Պահման պայմաններ

Պահել 25 °С -ից ցածր ջերմաստիճանի պայմաններում: 

Պահել երեխաների համար անհասանելի և անտեսանելի տեղում: 

Ռենգալինի ընդունման ընթացքում բլիստերը պահել դեղի տուփի մեջ:  

Պիտանիության ժամկետ 

3 տարի:

Դեղը չի կարելի կիրառել պիտանիության ժամկետը լրանալուց հետո:  

Դեղատնից բաց թողնելու կարգ 

Բաց է թողնվում առանց դեղատոմսի: