Օգտագործման հրահանգ

Արտադրող

««ԷՍԿՈ-ՖԱՐՄ» ՍՊԸ,  Հայաստան:

Դեղաձև

Արտաքին և տեղային (միկրոհոգնա) կիրառման լուծույթ:

Նկարագրություն

Անգույն, խոնավածուծ, քաղցր համով օշարականման հեղուկ:

Բաղադրություն

Ակտիվ նյութեր՝ գլիցերին – 90 գ։ 

Օժանդակ նյութեր՝ մաքրված ջուր – 10 գ։

Դեղաբանական խումբ

Մաշկը պաշտպանող և փափկեցնող դեղեր: 

Փորկապության բուժման համար կիրառվող դեղեր:

Դեղաբանական ազդեցությունը

Գլիցերինը տեղային ազդեցությամբ լուծողական դեղ է: Այն թեթևակի գրգռում է ուղիղ աղու լորձաթաղանթը և ռեֆլեկտոր մեխանիզմով խթանում է աղիների շարժունակությունը (պերիստալտիկա): Գլիցերինը նպաստում է կղազանգվածի փափկեցմանը: 

Արտաքին կիրառման դեպքում ցուցաբերում է մաշկը պաշտպանող և փափկեցնող ազդեցություն:

Դեղակինետիկա

Գլիցերոլը գործնականում չի ներթափանցում մաշկ, սակայն լավ է ներծծվում լորձաթաղանթներից:

Կիրառման ցուցումներ 

Գլիցերինը ցուցված է՝ 

• տարբեր ծագումով փորկապությունների (այդ թվում՝ սովորական, տարիքային, սահմանափակ շարժունակության արդյունքում առաջացած)
• մաշկի չորության (տեղային կիրառում) բուժման համար

Հակացուցումներ 

Գլիցերինը հակացուցված է՝  

• ուղիղաղիքային եղանակով կիրառելիս՝ թութքի (սրացման փուլում), հետանցքի ճաքերի, ուղիղ աղու բորբոքային հիվանդությունների և ուռուցքների դեպքում
• տեղային կիրառելիս՝ գլիցերոլի նկատմամբ գերզգայնության դեպքում 

Հղիություն և կրծքով կերակրում 

Գլիցերինը կարելի է կիրառել հղիության ընթացքում և կրծքով կերակրման շրջանում, սակայն նախքան օգտագործելը՝ անհրաժեշտ է խորհրդակցել բժշկի հետ:

Կիրառման եղանակը և դեղաչափերը

Ուղիղաղիքային կիրառում․ Մինչև 6 տարեկան երեխաների համար թույլատրելի օրական դեղաչափը 5 մլ է, 6 տարեկանից բարձր երեխաների և չափահասների համար՝ 5-15մլ: Դեղը ցանկալի է կիրառել նախաճաշից 15-20 րոպե անց։

Ուղիղաղիքային կիրառման եղանակ․ 5 մլ և 10 մլ ծավալով միկրոհոգնաները պատրաստի են ուղիղաղիքային կիրառման համար: 

Անհրաժեշտ է բացել պոլիէթիլենային փաթեթը, հեռացնել ծայրադիրի կափարիչը և կիրառել անհրաժեշտ ծավալով: Միկրոհոգնան նախատեսված է միանվագ կիրառման համար:

Տեղային կիրառում․ Քսել մաշկի ախտահարված հատվածներին՝ ըստ անհրաժեշտության:

Կողմնակի ազդեցույթուններ 

Երկարատև տեղային կիրառման դեպքում՝ մաշկի գրգռվածություն, ալերգիկ ռեակցիաներ:  

Երկարատև ուղիղաղիքային կիրառման դեպքում՝ ուղիղ աղու գրգռվածության երևույթներ, կղազատման ֆիզիոլոգիական պրոցեսի թուլացում:

Գերդեղաչափում 

ՄԳերդեղաչափման ախտանիշների վերաբերյալ տվյալներն առկա չեն: 

Դեղային փոխազդեցություն 

Այլ դեղերի հետ կլինիկորեն նշանակալի փոխազդեցություններ չեն գրանցվել, սակայն տեղային ազդեցությամբ այլ դեղերի հետ միաժամանակյա կիրառումը ցանկալի չէ: 

Հատուկ հրահանգներ

Խորհուրդ չի տրվում գլիցերինը կանոնավոր կիրառել որպես լուծողական միջոց: Նշված նպատակով կիրառելիս աղիների նորմալ շարժունակության վերականգնումից հետո բուժումն անհրաժեշտ է դադարեցնել: Որպես լուծողական՝ դեղի կիրառման տևողությունը չպետք է գերազանցի մեկ շաբաթը:

Թողարկման ձև

100 մլ ծավալով պլաստիկ սրվակներ, 30 մլ ծավալով ապակյա սրվակներ, 5 մլ կամ 10 մլ ծավալով՝ պոլիէթիլենային անհատական տոպրակների մեջ փաթեթավորված պլաստամասսե տարաներ (միկրոհոգնաներ):

Պահման պայմաններ

Պահել 15-25°C ջերմաստիճանի պայմաններում: 

Պահել երեխաների համար անհասանելի տեղում: 

Պիտանիության ժամկետ

4 տարի: 

Դեղը չի կարելի կիրառել տուփի վրա նշված պիտանիության ժամկետը լրանալուց հետո: 

Դեղատնից բացթողման կարգ 

Բաց է թողնվում առանց դեղատոմսի: