Դեղի օգտագործման հրահանգ

Արտադրող

«ՆՊՖ ՄԱՏԵՐԻԱ ՄԵԴԻԿԱ ՀՈԼԴԻՆԳ» ՍՊԸ, Ռուսաստան:

Դեղաձև

Բերանի խոռոչից ներծծվող դեղահատեր:

Նկարագրություն 

Սպիտակից մինչև գրեթե սպիտակ, ակոսիկով և երիզով տափակ գլանաձև դեղահատ, որի ակոսիկով կողմի վրա դրոշմված է MATERIA MEDICA, իսկ մյուս կողմի վրա՝ ERGOFERON:

Էրգոֆերոնի բաղադրություն

Յուրաքանչյուր դեղահատ պարունակում է.

Ակտիվ նյութեր՝ մարդու գամմա-ինտերֆերոնի աֆինային եղանակով մաքրված հակամարմիններ — 0,006 գ*, — հիստամինի աֆինային եղանակով մաքրված հակամարմիններ — 0,006 գ*, — CD 4-բջիջների աֆինային եղանակով մաքրված հակամարմիններ — 0,006գ*:

Օժանդակ նյութեր՝ լակտոզայի մոնոհիդրատ — 0,267 գ, միկրոբյուրեղային ցելյուլոզա — 0,03 գ, մագնեզիումի ստեարատ — 0,003 գ: 

*Ակտիվ բաղադրատարրերի` համապատասխանաբար 10012, 10030, 10050 նոսրացումներով ջրասպիրտային խառնուրդը շերտապատված է լակտոզայի մոնոհիդրատի վրա: 

Դեղաբանական խումբ

Իմունոմոդուլյատորներ, հակավիրուսային դեղեր: 

Դեղաբանական ազդեցությունը

Էրգոֆերոնը ցուցաբերում է հակավիրուսային, իմունոմոդուլատոր, հակահիստամինային և հակաբորբոքային ազդեցություն: 

Փորձարարական ուսումնասիրությունների արդյունքում ապացուցվել է, որ գամմաինտերֆերոնի հակամարմինները՝ 

• մեծացնում են ԻՖՆ-γ, ԻՆՖ-α/ß ինտերֆերոնների և դրանց հետ փոխկապակցված ինտերլեյկինների (ԻԼ-2, ԻԼ-4, ԻԼ-10 և այլն) ազդեցության արտահայտվածությունը (էքսպրեսիա)
• բարելավում են ինտերֆերոնների լիգանդ-ընկալիչային փոխազդեցությունը
• վերականգնում են ցիտոկինային կարգավիճակը
• կարգավորում են օրգանիզմի բնական հակավիրուսային դիմադրողականության կարևոր գործոնի՝ ԻՖՆ-γ հանդեպ բնական հակամարմինների կոնցենտրացիան և դրանց ֆունկցիոնալ ակտիվությունը
• խթանում են ինտերֆերոնակախյալ կենսաբանական պրոցեսները՝ I , II տիպի հյուսվածքային համատեղելիության գլխավոր համակարգի և Fc-ընկալիչների հակածինների ազդեցության արտահայտվածության մակածումը, մոնոցիտների ակտիվացումը, NK-բջիջների ֆունկցիոնալ ակտիվության խթանումը, իմունոգլոբուլինների սինթեզի կարգավորումը, ակտիվացնելով Th1 և Th2 տեսակի խառը իմունային պատասխանը

CD4 ընկալիչների հակամարմինները, հավանաբար հանդիսանալով նշված ընկալիչների ալլոստերիկ մոդուլյատորներ, կարգավորում են դրանց ֆունկցիոնալ ակտիվությունը, ինչը հանգեցնում է CD4 լիմֆոցիտների ֆունկցիոնալ ակտիվության բարձրացմանը, CD4/CD8 իմունակարգավորիչ hարաբերակցության, ինչպես նաև CD3, CD4, CD8, CD16, CD20 իմունիտետի համար պատասխանատու բջիջների ենթապոպուլյացիոն բաղադրության կարգավորմանը:

Հիստամինի հակամարմինները փոփոխում են ծայրամասային և կենտրոնական H1 ընկալիչների հիստամինակախյալ ակտիվացումը, հետևաբար թուլացնում են բրոնխների հարթ մկանների տոնուսը, նվազեցնում են մազանոթների թափանցելիությունը, ինչը հանգեցնում է քթարտադրության, քթի լորձաթաղանթի այտուցի, հազի և փռշտոցի մեղմացմանն ու տևողության կրճատմանը: Ալերգենի հետ շփման ռեակցիաներում բազոֆիլներից և պարարտ բջիջներից հիստամինի ձերբազատման, լեյկոտրիենների արտադրության, կպչողականությունը ապահովող մոլեկուլների, էոզինոֆիլների քեմոտաքսիսի գործոնի սինթեզի, տրոմբոցիտների ագրեգացիայի ընկճման շնորհիվ հանգեցնում է նաև՝ վարակին ուղեկցող ալերգիկ ռեակցիաների արտահայտման նվազեցմանը:

Դեղի բաղադրատարրերի համակցված կիրառումը ուղեկցվում է դրանց հակավիրուսային ազդեցության ուժեղացմամբ։

Դեղակինետիկա

Անալիզի ֆիզիկա-քիմիական ժամանակակից մեթոդների (գազահեղուկային քրոմատոգրաֆիա, բարձրարդյունավետ հեղուկային քրոմատոգրաֆիա, քրոմատոմասսպեկտրոմետրիա) զգայունությունը հնարավորություն չի տալիս որոշել դեղի ակտիվ բաղադրատարրերի չափազանց փոքր քանակները կենսաբանական հեղուկներում, օրգաններում և հյուսվածքներում: Այդ պատճառով Էրգոֆերոնի դեղակինետիկան տեխնիկապես անհնար է ուսումնասիրել։

Կիրառման ցուցումներ 

Էրգոֆերոնը, որպես համալիր բուժման բաղադրիչ, ցուցված է չափահասների և 3 տարեկանից բարձր երեխաների մոտ սուր շնչառական վիրուսային վարակների, այդ թվում՝ գրիպի բուժման համար:

Հակացուցումներ 

Էրգոֆերոնը հակացուցված է՝  

• բաղադրատարրերից որևէ մեկի նկատմամբ անհատական գերզգայնություն ունեցող պացիենտներին
• լակտազային անբավարարություն, գալակտոզայի անտանելիություն և գլյուկոզագալակտոզայի մալաբսորբցիայի համախտանիշ ունեցող պացիենտներին
• մինչև 3 տարեկան երեխաներին

Հղիություն և կրծքով կերակրում 

Հղիների շրջանում Էրգոֆերոնի կիրառման անվտանգությունն ուսումնասիրված չէ:

Հղիության և կրծքով կերակրման շրջանում դեղը կիրառում են միայն այն դեպքում, երբ մոր համար ակնկալվող օգուտը գերազանցում է պտղի և երեխայի համար հնարավոր ռիսկը: Օգուտ/ռիսկ հարաբերակցությունը որոշում է բուժող բժիշկը:

Կիրառման եղանակը և դեղաչափերը

Դեղահատն անհրաժեշտ է պահել բերանում՝ մինչև լրիվ լուծվելը: Դեղահատը չի կարելի կուլ տալ: Դեղը չի կարելի օգտագործել սննդի ընդունման ընթացքում: 

Բուժման առաջին օրվա ընթացքում անհրաժեշտ է ընդունել 8 դեղահատ հետևյալ կարգով. առաջին 2 ժամվա ընթացքում՝ 1 դեղահատ յուրաքանչյուր 30 րոպեն մեկ անգամ (ընդամենը՝ 5 դեղահատ), այնուհետև, նույն օրվա ընթացքում՝ 1 դեղահատ 3 անգամ հավասար ընդմիջումներով: Երկրորդ օրից սկսած և այնուհետ անհրաժեշտ է ընդունել 1 դեղահատ, օրական 3 անգամ ՝ մինչև լրիվ առողջացումը: 

Անհրաժեշտության դեպքում Էրգոֆերոնը կարելի է զուգորդել հակավիրուսային և ախտանիշային բուժման համար կիրառվող այլ դեղերի հետ: 

Կողմնակի ազդեցույթուններ 

Հնարավոր են դեղի բաղադրատարրերի նկատմամբ անհատական գերզգայնության դրսևորումներ: 

Կողմնակի ազդեցության ի հայտ գալու դեպքում այդ մասին պետք է տեղեկացնել բժշկին կամ դեղագետին: Սա վերաբերում է նաև այս ներդիր-թերթիկում չնշված որևէ այլ կողմնակի ազդեցությանը: 

Գերդեղաչափում 

Գերդեղաչափման դեպքում հնարավոր են մարսողության խանգարումներ՝ դեղի բաղադրության մեջ առկա օժանդակ նյութերով պայմանավորված: 

Դեղային փոխազդեցություն 

Այլ դեղերի հետ անհամատեղելիության դեպքեր մինչև այժմ չեն գրանցվել։

Հատուկ հրահանգներ

Բաղադրության մեջ լակտոզայի մոնոհիդրատի առկայության պատճառով Էրգոֆերոնը խորհուրդ չի տրվում օգտագործել բնածին գալակտոզեմիայով, գլյուկոզայի և գալակտոզայի մալաբսորբցիայի համախտանիշով կամ բնածին լակտազային անբավարարություն ունեցող պացիենտներին: 

Ազդեցությունը ուշադրություն պահանջող գործունեության վրա (փոխադրամիջոցների վարում, սարքավորումների հետ աշխատանք) 

Էրգոֆերոնը չի ազդում պոտենցիալ վտանգավոր և հատուկ ուշադրություն ու արագ ռեակցիա պահանջող աշխատանքների (փոխադրամիջոցների վարում, աշխատանք սարքավորումների հետ) կատարման վրա: 

Թողարկման ձև

Բերանի խոռոչում ներծծվող հոմեոպաթային դեղահատեր: 

Պոլիվինիլքլորիդային թաղանթից և ալյումինե նրբաթիթեղից պատրաստված շրջագծված բնիկավոր բլիստերը պարունակում է 20 դեղահատ: Ստվարաթղթե տուփի մեջ տեղադրված է 1, 2 կամ 5 շրջագծված բնիկավոր բլիստեր՝ դեղի օգտագործման հրահանգի (ներդիր-թերթիկի) հետ միասին:

Պահման պայմաններ

Պահել 25 °С -ից ոչ բարձր ջերմաստիճանի պայմաններում և լույսից պաշտպանված տեղում: 

Պահել երեխաների համար անհասանելի և անտեսանելի տեղում:

Պիտանիության ժամկետ

4 տարի։ Դեղը չի կարելի կիրառել պիտանիության ժամկետը լրանալուց հետո:

Դեղատնից բացթողման կարգ 

Առանց դեղատոմս։